మహేష్ బాబు, త్రివిక్రమ్… ఒకరు సూపర్ స్టార్, మరొకరు మాటల మాంత్రికుడు. వీళ్లిద్దరు కలిసి సినిమా చేస్తున్నారంటే సినిమా ప్రేమికులకు పూనకాలే. ఇప్పుడు వీళ్లిద్దరు కలిసి చేస్తున్న చిత్రం “గుంటూరు కారం”. సినిమా ఏ ముహూర్తాన మొదలయిందో కానీ అన్ని సమస్యలే. అనేక అడ్డంకులతో సినిమా వాయిదా పడుతూ వస్తోంది. ఈ సినిమాకు ముందుగా మహేష్ బాబు సరసన పూజ హెగ్డే హీరోయిన్ గా అనుకున్నారు. కానీ కొన్ని రోజుల క్రితం శ్రీలీల హీరోయిన్ అంటూ చిత్ర బృందం ప్రకటించింది. హీరోయిన్ మారిన కారణంగా కొన్ని సీనులు రీషూట్ చేస్తున్నారని సమాచారం. తాజాగా ఇప్పుడు ఈ చిత్రానికి పనిచేస్తున్న సినిమాటోగ్రాఫర్ కూడా తప్పుకున్నట్టు తెలుస్తోంది.
ఈ కాంబోకు సమస్యలు కొత్తేమి కాదండోయ్. త్రివిక్రమ్, మహేష్ బాబు కలిసి ఇంతకు ముందు రెండు చిత్రాలు చేసిన విషయం మనందరికీ తెలిసినదే. వీళ్లిద్దరి కాంబినేషన్లో వచ్చిన మొదటి చిత్రం “అతడు”. ఈ చిత్రం 2005 లో విడుదలయింది. థియేటర్లలో పెద్దగా రాణించకపోయిన టీవీలో టెలికాస్ట్ అయ్యాక టీఆర్ఫీలో రికార్డులు సృష్టించింది. ఒక మంచి ఫామిలీ ఎంటర్టైనర్ గా ప్రేక్షకులను ఆకట్టుకుంది. ఐతే కారణం ఏమిటో తెలీదు కానీ అప్పట్లో ఈ చిత్రం తెరకెక్కించడానికి రెండేళ్లు పట్టిందట.
వీళ్లిద్దరి కంబినేషన్లో వచ్చిన రెండో చిత్రం “ఖలేజా”. ఈ చిత్రం 2010 లో విడుదలయింది. ఒక కొత్త కధాంశంతో, మహేష్ బాబు స్టైల్ కు తీసి భిన్నంగా ఒక ప్రయోగం చేశారనే చెప్పాలి త్రివిక్రమ్. ఈ చిత్రానిది కూడా అదే వరస. థియేటర్లలో పెద్దగా రాణించలేదు కానీ టీవీ ప్రేక్షకులను ఆకట్టుకుంది. ఈ చిత్రాన్ని నిర్మించడానికి ఏకంగా మూడేళ్లు తీసుకున్నారట మన మాటల మాంత్రికుడు. కాని ఈ రెండు సినిమాలు ఎన్నిసార్లు చూసిన ఇంకా ఫ్రెష్‌గానే ఉంటాయి. ముందు రెండు సినిమాలకు ఎలా జరిగిందో ఇప్పుడు గుంటూరు కారం విషయంలో కూడా అదే రిపీట్ అవుతోంది. ఈ సినిమాను 2024 సంక్రాంతి బరిలో దింపేందుకు రెడీ అవుతున్నారు మేకర్స్. మరి అనుకున్నది అనుకున్నట్టు జరుగుతుందో లేదో వేచి చూడాల్సిందే.