అనుష్క శెట్టి.. ఈ పేరుకు ప‌రిచ‌యాలు అవ‌స‌రం లేదు. సూపర్ సినిమాతో తెలుగు ఇండ‌స్ట్రీకి ప‌రిచ‌య‌మైన ఈ భామ.. `విక్రమార్కుడు` సినిమాతో బ్లాక్ బ‌స్ట‌ర్ హిట్‌ను ఖాతాలో వేసుకుంది. ఇక తర్వాత వెన‌క్కి తిరిగి చూసుకోలేదు. అంచ‌లంచ‌లుగా ఎదుగుతూ టాలీవుడ్‌లోనే టాప్ హీరోయిన్‌గా గుర్తింపు తెచ్చుకున్న అనుష్క.. `అరుంధతి` మూవీతో లేడీ ఓరియెంటెడ్ చిత్రాల‌కు కేరాఫ్‌గా మారింది.
అలాగే బాహుబలిలో దేవసేన పాత్ర.. ఆమెకు మరో మైలురాయిగా చెప్పోచ్చు. అయితే అనుష్క 40వ బ‌ర్త్‌డే నేడు. ఈ సంద‌ర్భంగా మ‌హేష్ బాబు.పి డైరెక్షన్ లో యువి క్రియేషన్స్ బ్యానర్ పై త‌న 48వ చిత్రాన్ని ప్ర‌క‌టించింది. త్వ‌ర‌లోనే ఈ చిత్రం సెట్స్ మీద‌కు వెళ్ల‌నుంది. అనుష్క పర్సనల్ విషయాలకు వస్తే.. మంగుళూరులో పుట్టిన అనుష్క పాఠశాల, కళాశాల విద్య అంతా బెంగుళూరులోనే జరిగింది. ఈమె మాతృభాష తులు.
కుటుంబ సభ్యులు ఈమెను స్వీటీ అని పిలిస్తే.. సన్నిహిత స్నేహితులు `టొమ్ములు` అని ముద్దుగా పిలుస్తారు. హిస్టరీ, ఎకనామిక్స్‌, సైకాలజీ, సోషియాలజీలో డిగ్రీ చేసిన అనుష్క బీసీఏ కూడా పూర్తి చేసింది. ఆ తర్వాత ఓ స్కూల్‌లో మూడో తరగతి పిల్లలకు పాఠాలు చెప్ప‌డ‌మే కాదు యోగా టీజ‌ర్‌గా కూడా ప‌ని చేసింది. ఆ తర్వాత హీరోయిన్‌గా నిల‌దొక్కుకున్న ఈ బెంగుళూరు భామ తెరపై ఎలా ఉన్నా.. తెర వెనుక మాత్రం చాలా పద్ధతిగా ఉంటుంది.