యంగ్ టైగర్ ఎన్.టి.ఆర్ సైలెంట్‌గా పాన్ ఇండియా రేంజ్ సినిమాలను లైనప్ చేసుకుంటున్నారు. ఆర్ఆర్ఆర్ వల్ల ఇప్పటికే తారక్ నుంచి కనీసం నాలుగు నుంచి ఆరు సినిమాలు రావాల్సింది కానీ, ఒక్కటి కూడా రాలేదు. ఆర్ఆర్ఆర్ తర్వాత కూడా కొత్త ప్రాజెక్ట్స్ రెండు అనౌన్స్ అయినా కూడా ఇంకా అవి ఇంకా సెట్స్ మీదకు రాలేదు. ఎన్.టి.ఆర్ తన 30, 31 చిత్రాలను అధికారికంగా ప్రకటించారు. కొరటాలతో యాక్షన్ సినిమాగా ఎన్.టి.ఆర్ 30 తెరకెక్కబోతోంది. ఇక కేజీఎఫ్ చిత్రాలతో పాన్ ఇండియా డైరెక్టర్‌గా మారిన ప్రశాంత్ నీల్ దర్శకత్వంలో తన 31వ సినిమాను చేస్తుండగా తారక్ కెరీర్‌లో మొదటిసారి అత్యంత భారీ యాక్సన్ సినిమాగా రానుంది.
ఈ సినిమాలో ఎన్.టి.ఆర్ నెగిటివ్ పాత్రను పోషిస్తున్నట్టు వార్తలు వస్తున్నాయి. ఇదిలా ఉంటే, సినీ వర్గాలలో ఇన్‌సైడ్ టాక్ ఒకటి వినిపిస్తోంది. ఇటీవల విశ్వనటుడు కమల్ హాసన్ హీరోగా సూర్య, విజయ్ సేతుపతి, ఫహాద్ ఫాజిల్ కీలక పాత్రలో నటించిన విక్రమ్ సినిమాతో భారీ హిట్ అందుకున్న తమిళ క్రేజీ డైరెక్టర్ లోకేష్ కనగరాజ్ దర్శకత్వంలో నటించేందుకు తారక్ గ్రీన్ సిగ్నల్ ఇచ్చినట్టు తెలుస్తోంది.
ప్రశాంత్ నీల్ దర్శకత్వంలో కూడా తారక్ నటించే సినిమాకు సంబంధించిన విషయం చాలా నెలలు గోప్యంగా ఉంచారు. మైత్రీ వారు కంటే ముందు తారక్ ప్రశాంత్ నీల్‌కు బర్త్ డే విషెస్ చెప్పి చిన్న హింట్ ఇచ్చారు. ఆ తర్వాత వీరి కాంబోలో సినిమా ఉండబోతుందని అఫీషియల్‌గా వెల్లడైంది. ఇప్పుడు కూడా లోకేష్ దర్శకత్వంలో సినిమా అనేది గోప్యంగా ఉంచారట. విక్రమ్ కంటే ముందు తీసిన ఖైదీ, విజయ్ మాస్టర్ సినిమాలతో కోలీవుడ్‌లో స్టార్ డైరెక్టర్‌గా మంచి క్రేజ్ తెచ్చుకున్నాడు లోకేష్ కనగరాజ్.
తీసిన నాలుగు సినిమాలలో మూడు వరుసగా బ్లాక్ బస్టర్ సాధించాయి. ఇప్పుడు విజయ్, రజనీకాంత్, రామ్ చరణ్‌లతో సినిమాలను కమిటయ్యాడు. అయితే, తారక్ తన 32వ సినిమాను లోకేష్ కనగరాజ్ దర్శకత్వంలో చేసేందుకు ఇప్పటికే ఒకే చెప్పాడట. ఇక్కడ విశేషం ఏమిటంటే తమిళంలో తారక్‌కు ఇది స్ట్రైట్ సినిమా అని తెలుస్తోంది. ఇదే నిజమైతే నందమూరి అభిమానులు సంబరాలు చేసుకోవడం పక్కా.