యువ‌ర‌త్న, నందమూరి నటసింహం బాలయ్య కేరీర్‌లో ప్ర‌తిష్టాత్మ‌క‌మైన 100వ సినిమాగా తెర‌కెక్కుతోన్న గౌత‌మీపుత్ర శాత‌క‌ర్ణి సినిమా సంక్రాంతి కానుక‌గా ప్రేక్ష‌కుల ముందుకు వ‌స్తోంది. ఆంధ్ర‌దేశాన్ని పాలించిన శాత‌వాహ‌న యువ‌రాజు గౌత‌మీపుత్ర శాత‌క‌ర్ణి జీవిత చ‌రిత్ర ఆధారంగా తెర‌కెక్కుతోన్న ఈ సినిమాపై టాలీవుడ్ స‌ర్కిల్స్‌లో భారీ అంచ‌నాలు ఉన్నాయి.
విలక్షణ దర్శకుడు క్రిష్ తెరకెక్కిస్తోన్న ఈ సినిమాకు భారీ ఎత్తున ప్రి రిలీజ్ బిజినెస్ జ‌రుగుతోంది. ఈ సినిమాకు బాలయ్య కేరీర్‌లో హ‌య్య‌స్ట్ ప్రి రిలీజ్ బిజినెస్ జ‌రిగింది. ఓవ‌ర్సీస్‌లో సైతం ఇప్ప‌టి వ‌ర‌కు బాలయ్య ఏ సినిమాకు జ‌ర‌గ‌ని విధంగా బిజినెస్ జ‌రిగింది.
షూటింగ్ కంప్లీట్ చేసుకున్న శాత‌క‌ర్ణి ప్రస్తుతం పోస్ట్ ప్రొడక్షన్ కార్యక్రమాలు జరుపుకుంటోంది. ఇక ఈ సినిమా ర‌న్ టైంను దర్శకుడు క్రిష్ ఫిక్స్ చేశాడు. శాత‌క‌ర్ణి టోట‌ల్ ర‌న్ టైం 2 గంట‌ల 12 నిమిషాలుగా ఉండ‌నుంది. క్రిష్ గ‌త సినిమాల్లాగానే ఈ సినిమాకు సైతం త‌క్కువ ర‌న్ టైం ఉండ‌నుంది.
డిసెంబర్ 16న తిరుపతిలో నిర్వహించే ఆడియో వేడుకతో సినిమా ప్రమోషన్స్‌కు టీం శ్రీకారం చుట్టేందుకు సిద్ధమవుతోంది. ఈ సినిమాలో బాలయ్య స‌ర‌స‌న యువ‌రాణిగా శ్రియ న‌టిస్తుండ‌గా, బాలయ్య త‌ల్లి పాత్ర‌ను ప్ర‌ముఖ బాలీవుడ్ సీనియ‌ర్ హీరోయిన్ హేమ‌మాలిని న‌టిస్తోన్న సంగ‌తి తెలిసిందే