ఇప్పుడు దేశంలోనే కాదు ప్రపంచ వ్యాప్తంగా ఎక్కడ విన్న ఒకే ఒక్క మాట వినబడుతోంది.. అదే Avatar 2. అవును, సినిమా ప్రేక్షకుల 13 ఏళ్ల నిరీక్షణ ఎట్టకేలకు ఫలించింది. సినీ ప్రేక్షకులు ఎప్పుడెప్పుడా అని ఎదురుచూస్తున్న అవతార్ 2 ఈరోజు శుక్రవారం రిలీజయింది. ప్రపంచవ్యాప్తంగా 52000 స్క్రీన్స్ లో ఈ చిత్రం భారీ స్థాయిలో విడుదలైంది. రిలీజ్ కు ముందే అడ్వాన్స్ బుకింగ్స్ లో రికార్డుల మోత మోగించింది. గతంలో ఏ సినిమాకు లేనంతగా అవతార్ 2కు అడ్వాన్స్ బుకింగ్స్ జరిగాయి. ఈ క్రమంలోనే ఇండియాలో KGF రికార్డును బ్రేక్ చేయడం విశేషం.
కాగా విడుదలకు ముందే ఈ మూవీ సోషల్ మీడియాలో లీక్ కావడం వలన ఈ మూవీకి దాదాపు 100 కోట్ల వరకు నష్టాలు వచ్చినట్లుగా ట్రేడ్ పండితులు చెబుతున్నారు. అసలు విషయానికొస్తే, ఈ సినిమా ప్రమోషన్లలో భాగంగా ఓ ఇంటర్వ్యూలో పాల్గొన్న నటి కేట్ విన్స్ లెట్ ఈ చిత్రం షూటింగ్ లో ఓ సీన్ కోసం తాను దాదాపు 7 నిమిషాల 15 సెకన్ల పాటు ఊపిరి తీసుకోకుండా నటించాల్సి వచ్చిందని చెప్పి అందరినీ ఆశ్చర్యపరిచింది. దీంతో గతంలో హాలీవుడ్ స్టార్ టామ్ క్రూజ్ రికార్డ్ ను బ్రేక్ చేసింది ఈ హీరోయిన్.
గతంలో మిషన్ ఇంపాజిబుల్ రోగ్ నేష్ సెట్ లో టామ్ దాదాపు 6 నిమిషాల పాటు ఊపిరి తీసుకోకుండా టామ్ నటించాడు. సాధారణంగా ఓ వ్యక్తి కేవలం రెండు నిమిషాలు మాత్రమే అలా ఉండగలడు. అలాగే నీటి అడుగున షూటింగ్ చేస్తున్నప్పుడు ఎంతో ఒత్తిడి భరించానని.. ఆ సమయంలో తాను చనిపోయానని అనుకుని గట్టిగా అరిచానని.. ఇందుకు సంబంధించిన వీడియో కూడా తన వద్ద ఉన్నట్లు చెప్పుకొచ్చింది ఈ అమ్మడు. లెజెండరీ డైరెక్టర్ జేమ్స్ కామెరూన్ తెరకెక్కించిన అవతార్ 2 సినిమాలో కేట్.. రోనల్ అనే పాత్రలో అలరించింది.
Avatar 2లో ఆ ఒక్క సీన్ కోసం ఏకధాటిగా 7 నిమిషాలు ఊపిరి తీసుకోవడం మానేశారట తెలుసా?