టాలీవుడ్‌లో ప‌లు చిత్రాలు చేసి ఆపై బాలీవుడ్‌కి మ‌కాం మార్చేసిన తాప్సీ.. అక్క‌డ బాగానే స‌క్సెస్ అయింది. బాలీవుడ్‌లో లేడీ ఓరియెంటెడ్ చిత్రానికి కేరాఫ్ అడ్ర‌స్‌గా మారిన తాప్సీ.. ప్ర‌స్తుతం వ‌రుస సినిమాల‌తో దూసుకుపోతోంది. అలాగే ఇటీవ‌లె ఈ భామ నిర్మాత‌గానూ మారి ‘అవుట్‌సైడర్స్‌ ఫిల్మ్స్‌’ పేరుతో ఓ నిర్మాణ సంస్థను ఆరంభించింది.
అయితే తాజా స‌మాచారం ప్ర‌కారం.. తాప్సీ త‌న బ్యాన‌ర్‌పై మొద‌టి చిత్రాన్ని టాలీవుడ్ టాప్ హీరోయిన్ స‌మంత‌తో చేయ‌బోతోంద‌ట. అది కూడా ఓ లేడీ ఓరియెంటెడ్ చిత్ర‌మ‌ట. ప్ర‌స్తుతం ఈ ప్రాజెక్ట్‌పైనే తాప్సీ స‌మంత‌తో చ‌ర్చ‌లు జ‌రుపుతుంద‌ని.. సామ్ సైతం ఇంట్ర‌స్ట్‌గానే ఉంద‌ని తెలుస్తోంది.
ఇక మ‌రో ఆస‌క్తిక‌ర విష‌యం ఏంటంటే.. నిర్మాత‌గానే కాకుండా ఈ చిత్రంలో తాప్సీ ఓ కీల‌క రోల్‌ను కూడా పోషించబోతోంద‌ని బాలీవుడ్ వ‌ర్గాల్లో టాక్ న‌డుస్తోంది. అయితే ఈ ప్రాజెక్ట్‌పై అధికారిక ప్ర‌క‌ట‌న రావాల్సి ఉంది. మ‌రి ఒక‌వేళ ఈ ప్ర‌చార‌మే నిజ‌మైతే.. స‌మంత తొలి బాలీవుడ్ చిత్రం ఇదే అవుతుంది.