విక్రమ్‌ హీరోగా మరో సైంటిఫిక్‌ మూవీ తెరకెక్కుతోంది. ప్రయోగాత్మక సినిమాలకు విక్రమ్‌ పెట్టింది పేరు. ‘అపరిచితుడు’తో విక్రమ్‌ రేంజ్‌ ఎక్కడికో వెళ్లిపోయింది. విజువల్‌ వండర్‌గా తెరకెక్కిన ‘ఐ’ సినిమా విడుదలకు ముందే భారీ అంచనాలను నమోదు చేసింది. కానీ విజయంలో ఆ అంచనాలను అందుకోలేకపోయింది. ఇప్పుడు మరో ప్రయోగంతో ముందుకొస్తున్నాడు విక్రమ్‌. అదే ‘ఇంకొక్కడు’ సినిమా.
ఈ సినిమాలో విక్రమ్‌ ‘భారత నిఘా సంస్థ రీసెర్చ్‌ అండ్‌ అనాలసిస్‌ వింగ్‌కి సంబంధించిన అధికారిగా నటిస్తున్నాడు. తాజాగా విడుదలైన ఈ సినిమా ట్రైలర్‌ సినిమాపై భారీగా అంచనాలను పెంచేస్తోంది. విక్రమ్‌కి ‘అపరిచితుడు’ వంటి విజయాన్ని తెచ్చిపెట్టనుందని ఆశిస్తున్నారు అంతా. విక్రమ్‌ కూడా ఈ సినిమాపై చాలా ఆశలు పెట్టుకున్నాడు. ఈ మధ్య వరుస అపజయాలతో కొట్టుమిట్టాడుతున్నాడు విక్రమ్‌. సో ఈ సినిమా విజయం విక్రమ్‌కి తప్పనిసరి. అంతేకాదు భారీ బడ్జెట్‌ మూవీగా కూడా ఈ సినిమా రూపొందుతోంది.
ఈ సినిమాలో డిఫరెంట్‌ గెటప్స్‌లో కనిపిస్తున్నాడు విక్రమ్‌. అంతేకాదు పాజిటివ్‌ అండ్‌ నెగిటివ్‌ రోల్‌లో కూడా కనిపిస్తాడట. ఈ సినిమాలో నిత్యామీనన్‌, నయనతారలు హీరోయిన్లుగా నటిస్తున్నారు. నిత్యామీనన్‌ ఈ సినిమాలో అండర్‌ కాప్‌ క్యారెక్టర్‌లో అధికారిణి పాత్రలో కనిపిస్తోంది ట్రైలర్‌లో. అంతేకాదు ప్రస్తుతం నయనతార నటించిన సినిమాలన్నీ విజయం దిశగా పరుగులు పెడుతున్నాయి. సో నయన్‌ లక్‌ విక్రమ్‌కి కలిసొస్తుందో లేదో చూడాలి.