ఎలాంటి సినీ బ్యాక్గ్రౌండ్ లేకపోయినా తెలుగు సినీ పరిశ్రమలు తమకంటూ ప్రత్యేకమైన ఇమేజ్ను సంపాదించుకున్న అతి కొద్దిమంది హీరోల్లో నిఖిల్ ఒకడు. అసిస్టెంట్ డైరెక్టర్ గా కెరీర్ ప్రారంభించిన నిఖిల్.. పలు సీరియల్స్ లోనూ నటించాడు. ఆ తర్వాత హీరోగా మరి విభిన్నమైన కథలతో ప్రేక్షకులకు దగ్గరయ్యాడు.
రీసెంట్గా కార్తికేయ 2 సినిమాతో బిగ్గెస్ట్ బ్లాక్ బస్టర్ హిట్ ను ఖాతాలో వేసుకుని పాన్ ఇండియా స్టార్గా గుర్తింపు పొందిన నిఖిల్.. తాజాగా 18 పేజెస్ సినిమాతో ప్రేక్షకులను పలకరించాడు. ఈ సినిమాకు సైతం మంచి స్పందన లభించింది. ఈ సంగతి పక్కన పెడితే.. నిఖిల్ హీరో అవ్వడానికి చాలా కష్టాలు పడ్డాడట. కొందరి చేతిలో మోసపోయి చేతులు కూడా కాల్చుకున్నాడట. ఈ విషయాన్ని నిఖిల్ తాజాగా బయటపెట్టాడు.
`హీరో కావడానికి ఎన్నో ఆడిషన్స్ ఇచ్చాను. కొందరికి నా యాక్టింగ్ నచ్చి ఆఫర్లు ఇస్తామని చెప్పి ఆ తర్వాత పట్టించుకునేవారు కాదు. ఇంకొందరేమో రూ.50 లక్షలు, రూ. కోటి తీసుకురా హీరోను చేస్తామనేవారు. అలా ఒకసారి నేను హీరో అవ్వడానికి రూ. 5 లక్షలు ఇచ్చి దారుణంగా మోసపోయాను. ఇక శేఖర్ కమ్ముల గారికి నా యాక్టింగ్ నచ్చి హ్యాపీ డేస్ సినిమాలో ఛాన్స్ ఇచ్చారు. ఆయనే ఫస్ట్ చెక్ ఇచ్చారు. ఇప్పటికి దాన్ని దాచుకున్నాను. ఆ సినిమా తర్వాతే నాకు వరుస అవకాశాలు వచ్చాయి` అంటూ నిఖిల్ చెప్పుకొచ్చాడు.