తెలుగు ఇండస్ట్రీలో భారీ అంచనాల పై దృష్టి నిలిపిన ప్రాజెక్ట్ అంటే అది ఎస్‌ఎస్‌ఎంబీ 29 (SSMB29). సూపర్ స్టార్ మహేష్ బాబు – దర్శకధీర రాజమౌళి కాంబినేషన్‌లో తెరకెక్కుతున్న ఈ సినిమా ప్రస్తుతం పలు కారకాల వలన చిన్న బ్రేక్‌లో ఉంది. అయితే ఈ గ్యాప్‌లో జక్కన్న మళ్లీ తన అంతర్జాతీయ దృష్టిని బయటకు చూపించారు. అందులో భాగంగా ప్రస్తుతం హాలీవుడ్ టైఅప్ పై పెద్ద ప్లాన్ నడుస్తోంది.
ఇప్పటికే ఈ మూవీకి సంబంధించిన డాన్స్ రిహార్సల్స్ మొదలైపోయాయి. కానీ ప్రధానంగా ప్రొడక్షన్ గురించి ఒక పెద్ద స్కెచ్ జరుగుతోంది. రాజమౌళి గత సినిమాగా వచ్చిన RRR సినిమా ఆస్కార్ అవార్డుల్లో దుమ్ము రేపినప్పటికీ , అది ఫారిన్ ఫిల్మ్ క్యాటగిరీలో అప్లై చేయాల్సి రావడంతో కొన్ని అవార్డులను కోల్పోయింది. అదే తప్పుని SSMB29లో పునరావృతం చేయకుండా, ఇది నేరుగా ఓ హాలీవుడ్ ప్రొడక్షన్ హౌస్‌తో కలిసిన ప్యాన్ వరల్డ్ మూవీగా రూపొందించాలన్నదే రాజమౌళి లక్ష్యం.
ఈ నేపథ్యంలో రాజమౌళి తన బంధువుతో పాటు ప్రొడ్యూసర్ అయిన ఎస్‌ఎస్ కార్తికేయ ద్వారా పలు హాలీవుడ్ సంస్థలతో చర్చలు జరుపుతున్నారని సమాచారం. ఇప్పటికే రెండు మూడు ప్రొడక్షన్ హౌసెస్ నుంచి ఆసక్తికరమైన ప్రతిపాదనలు వచ్చాయని, వాటిపై ఆలోచన జరుపుతున్నారట. ఇదే క్రమంలో ప్రస్తుతం ఈ సినిమా నిర్మాతగా ఉన్న డాక్టర్ కెఎల్ నారాయణ నిర్మాణ సంస్థ శ్రీ దుర్గా ఆర్ట్స్ను ఒక సెకండరీ బ్యానర్గా వుంచి, మెయిన్ బ్యానర్గా ఓ హాలీవుడ్ సంస్థను తెరపైకి తేవాలనే ఆలోచన సాగుతోంది. ఇది జరిగితే, ఈ మూవీ ఇంటర్నేషనల్ అవార్డుల పోటీకి నేరుగా అర్హత పొందుతుంది.
ఇంతకీ కథపై స్పష్టత ఇవ్వకపోయినా, ఇది ఓ అడ్వెంచరస్ గ్లోబల్ ట్రావెల్ డ్రామా కానుందని, అలాగే 2027లో విడుదల చేయాలనే లక్ష్యంతో రాజమౌళి పనిచేస్తున్నారని తెలుస్తోంది. వచ్చే ఏడాది వేసవిలో షూటింగ్ కంప్లీట్ చేయాలన్నదే పథకం. ఇక, ఆగస్ట్ 9న మహేష్ బాబు పుట్టినరోజున ఓ స్పెషల్ అప్డేట్ ఇవ్వాలని బృందం యోచిస్తోంది.ఈ ప్రాజెక్ట్ తెలుగుతో పాటు ఇంగ్లీష్ వర్షన్ కూడా స్ట్రెయిట్‌గా ప్లాన్ చేయాలన్నది రాజమౌళి ప్రణాళిక. అంటే, ఇది ప్యాన్ ఇండియా మాత్రమే కాదు… ప్యాన్ వరల్డ్ సినిమాగా ఇండియన్ సినిమాకే ఒక కొత్త మైలురాయిగా నిలిచే అవకాశం ఉంది!