బిగ్ బాస్ ఎప్పుడు ఏం చెప్పినా చేసేందుకు రెడీ అన్నట్టుగా ఉన్నారు కంటిస్టెంట్లు. అయితే వీరు అలర్ట్ గా ఉన్నప్పుడు కాదు. తనకు నచ్చినప్పుడు మాత్రమే టాస్కులు పెడతా అన్నట్టుగా ప్రవర్తిస్తున్నాడు బిగ్ బాస్. మరి అప్పటివరకు చేసేదేంటి చెప్మా? అంటూ.. హౌస్‌మేట్స్ బుర్రలు బద్ధలు కొట్టుకుంటున్నారు. కొందరు ఇంటి పనులు చేస్తుంటే మరికొందరు అప్పుడప్పుడు ఏదో ఒక పని చేసినట్లుగా బిల్డప్ ఇస్తున్నారు. పాటలు పాడటం, డాన్స్లు వేయడం.. ఇలా ఎవరికి నచ్చింది వారు చేసుకుంటూ పోతున్నారు. అయితే స్వతహాగా నటుడైన శివాజీ ఏదైనా కొత్తగా ట్రై చేద్దామనుకుని షకీలాకు ఓ ఐడియా ఇచ్చాడు.
రాత్రిపూట దెయ్యం పట్టినట్టుగా ప్రవర్తించి అందరికీ కంటిమీద కునుకు లేకుండా చేశారు. రాత్రిపూట అందరి నిద్ర పాడు చేయడం కరెక్ట్ కాదేమో అని క్షణమైనా ఆలోచించలేదు షకీలా. శివాజీ చెప్పిన దానికి తలుపుతూ అర్ధరాత్రి ప్లాన్ అమల్లో పెట్టింది. నిద్రలో నుంచి సడన్ గా లేచి కళ్ళు పెద్దవి చేస్తూ ఎవరో వస్తున్నారని మాట్లాడుతూ అందరిని భయపెట్టింది. ఇది డ్రామా అని తెలియక చాలామంది కంటెస్టెంట్లు దడుచుకుని చచ్చారు. టేస్టీ తేజ అయితే షకీలా సడన్గా లేచి కూర్చోవడంతో చాలా భయపడ్డాడు. కానీ వీళ్లు చేసిన పని వల్ల ఇంటి సభ్యులంతా నిద్రకు దూరమయ్యారు.
తీరా చావు కబురు చల్లగా చెప్పినట్లు ఇది డ్రామా అని చెప్పుకొచ్చారు. షాకైన దామిని రాత్రిపూట అలా చేయడం చాలా తప్పు అని ముఖం మీదే చెప్పేసింది. దీంతో ఓ క్షణం పాటు తను చేసిన తప్పని ఆలోచించడంలో పడింది షకీలా… ఈ కారణంతో నామినేట్ చేస్తే ఊరుకునేది లేదంది. నామినేషన్ కోసం కారణాలు వెతుక్కునే కంటిస్టెంట్లకు ఈ పాయింట్ ఇప్పుడు బ్రహ్మాస్త్రంగా దొరకనుంది. శివాజీ మాట విని షకీలా తన కొమ్మను తానే నరుక్కున్నట్టయింది. నిజంగా షకీలాకు ఏదైనా జరిగినా ఇకపై ఎవరు నమ్మే పరిస్థితుల్లో లేకుండా పోయారు.