ఎప్పుడెప్పుడా అని ఎదురుచూస్తున్న మూవీ ఆర్టిస్ట్స్ అసోసియేషన్(మా) ఎన్నికలకు టైమ్ దగ్గర పడింది. ఇంకా పోలింగ్కు కొన్ని గంటల సమయం మాత్రమే మిగిలింది. ఈ సారి ఎన్నికల్లో అధ్యక్ష పదవి కోసం మంచు విష్ణు, ప్రకాశ్ రాజ్లు పోటీ పడుతుండగా.. ఇప్పటికే ఇరు వర్గాలు హామీలు, ఆరోపణలు, సవాళ్లతో మా వేడెక్కిపోతోంది.
ఇదిలా ఉంటే.. మా ఎన్నికలకు ఏర్పాట్లు అన్నీ పూర్తి అయ్యాయి. జూబ్లీహిల్స్ రోడ్ నెం.71లోని జూబ్లీహిల్స్ పబ్లిక్ స్కూల్లో ఆదివారం ఈ ఎన్నికలు ఉదయం 8 నుంచి మధ్యాహ్నం 2 గంటల వరకు జరుగుతాయి. మొత్తం మూడు గదుల్లో 12 పోలింగ్ స్టేషన్లు ఏర్పాటు చేశారు.
ఒక గదిలో ఒకేసారి నలుగురు ఓటర్లు ఓటు హక్కును వినియోగించుకునే అవకాశాన్ని కల్పించారు. ఇక ఈ ఎన్నికల్లో మొత్తం 883 మంది ఓటర్లు ఓటు హక్కు వినియోగించుకోనున్నారు. అలాగే జూబ్లీహిల్స్ పోలీసులు పోలింగ్ కేంద్రం వద్ద భారీ బందోబస్తును కూడా ఏర్పాటు చేస్తున్నారు. కాగా, ఎన్నికల ఫలితాలు అక్టోబర్ 11న రానున్నాయి.