ఎలాంటి బ్యాక్గ్రౌండ్ లేకుండా అసిస్టెంట్ డైరెక్టర్ నుంచి టాలీవుడ్ టాప్ హీరో వరకు ఎదిగిన న్యాచురల్ స్టార్ నానికి ఇప్పుడు ఓ పెద్ద చిక్కే వచ్చి పడింది. గత కొంత కాలం నుంచి ఈయన నటించిన సినిమాలన్నీ ప్రేక్షకులను ఆకట్టుకోవడంలో విఫలం అవుతున్నాయి. ముఖ్యంగా ఈ మధ్య ఓటీటీలో భారీ అంచనాల నడుము విడుదలైన వి, టక్ జగదీష్ చిత్రాలు ఘోరంగా బోల్తా పడ్డాయి.
వి, టక్ జగదీష్ సినిమాలు ఓటీటీకి వెళ్లినప్పుడు పెద్ద ఎత్తున విమర్శలొచ్చినా.. వాటి ఫలితాలు చూసి బతికాం రా దేవుడా అనుకుంటున్నారు బయ్యర్లు. ఓ రకంగా.. నాని కెరీర్లోనే ఇవి రెండూ పెద్ద డిజాస్టర్లు అని చెప్పాలి. అయితే వీటి నెగటివ్ టాక్ ఇప్పుడు నాని తర్వాతి చిత్రాలపై పడటం ఖాయంగా కనిపిస్తోంది. నాని ప్రస్తుతం శ్యామ సింగరాయ్, అంటే సుందరానికి సినిమాల్లో నటిస్తున్నాడు.
ఈ రెండు చిత్రాలు థియేటర్లోనే విడుదల కానున్నాయి. రాహుల్ సాంకృత్యన్ తెరకెక్కిస్తున్న శ్యామ్ సింగరాయ్ సినిమా కోసం దాదాపు 40 కోట్ల బడ్జెట్ పెడుతుండగా.. అంటే సుందరానికి సినిమాను దాదాపు పాతిక కోట్ల బడ్జెట్తో తెరకెక్కిస్తున్నారు. అయితే ఇప్పుడు ఈ రెండు చిత్రాలు అంత బిజినెస్ చేస్తాయా అన్నది పెద్ద ప్రశ్నగా మారింది. ఏదేమైనా ముందు సినిమాల ఫ్లాప్ టాక్.. నాని రాబోయే సినిమాలకు శాపంగా మారడంతో ఆయన ఫ్యాన్స్ కాస్త ఆందోళన చెందుతున్నారు.