ఎంతైనా.. కేసీఆర్.. కేసీఆరే.. రాజకీయ ఎత్తులు..పై ఎత్తులు వేయడంలో ఆయనకెవరూ సాటిలేరనే చెప్పవచ్చు. ప్రస్తుత తెలంగాణ రాజకీయ నాయకుల్లో గులాబీ బాస్ ప్లాన్స్ పసిగట్టడం చాలా కష్టం.. ఆయన తీసుకునే నిర్ణయాలు ఊహకేమాత్రం అందవు. ఏ పథకం ప్రవేశపెట్టినా లబ్ధి పొందేందుకే.. అధికారం కోసమే.. ఈ విషయం దళిత బంధు పథకం ప్రకటించినప్పుడు స్వయంగా ఆయనే ఒప్పుకున్నారు కూడా. సీఎం తీసుకున్న మరో నిర్ణయం ఏమంటే.. సింగరేణి కార్మికుల వయోపరిమితి 61 సంవత్సరాలకు పెంపు. దీంతో సింగరేణి కార్మికుల్లో హ్యపీ.. అయితే ఈ సమయంలో ఈ నిర్ణయం ఎందుకు తీసుకున్నారో అని పెద్దగా ఎవరూ ఆలోచించరు. ఒక్క సింగరేణి కార్మికులకు తప్ప. ఈ విషయం సీఎంకు కూడా తెలుసు.
సింగరేణిలో ఎన్నికలు ఎప్పుడైనా జరగవచ్చు. అక్కడ గుర్తింపు పొందిన కార్మిక సంఘంగా విజయం సాధించాలంటే ఏదో ఒక హామీ ప్రకటించాలి. అది ఫలితమివ్వాలి.. అందుకే ముఖ్యమంత్రి హోదాలో ఈ హామీ ఇచ్చారు. దీంతో 43,889 మంది కార్మికులు హ్యాపీ.. టీఆర్ఎస్ పార్టీకి అనుబంధంగా ఉన్న తెలంగాణ బొగ్గు గని కార్మిక సంఘం (టీబీజీకేఎస్) గత ఎన్నికల్లో విజయం సాధించింది. అయినా కార్మికుల్లో పెద్ద సంతోషం లేదు. ఈ సంవత్సరం ఏప్రిల్ 16 నాటికి కాలపరిమితి ముగిసింది. అయితే కోవిడ్ కారణంగా ఎన్నికలు వాయిదా పడ్డాయి. ఈ నేపథ్యంలో వయోపరిమితి పెంచడం చర్చనీయాంశమైంది.