సౌత్ లేడీ సూప‌ర్ స్టార్ న‌య‌న‌తార అరుదైన ఘ‌న‌త‌ను ద‌క్కించుకుంది. అంతర్జాతీయంగా పేరున్న ఫోర్బ్స్ మీడియా సంస్థ కవర్ పేజీపై సినీ తారల ఫొటోలు పబ్లిష్ అవ్వ‌డం చాలా అరుదు. ఒక‌వేళ పబ్లిష్ అయినా హాలీవుడ్‌, బాలీవుడ్ తార‌లే క‌నిపిస్తుంటారు. కానీ, తాజాగా నయన్ ఆ అద్భుత‌మైన అవ‌కాశాన్ని ద‌క్కించుకుంది.
అవును, ఫోర్బ్స్ కవర్ పేజీ మీద న‌య‌న‌తార దర్శ‌న‌మిచ్చింది. దాంతో ఫోర్బ్స్ కవర్ పేజీపై కనిపించిన తొలి దక్షిణాది నాయికగా నయన్ రికార్డు సృష్టించింది. ఇక ఈ కవర్ పేజీ మీద నయనతారతో పాటు.. దుల్కర్ సల్మాన్.. యష్‌లు కూడా క‌నిపిస్తారు.
సౌత్ ఇండియా సినిమా ఇండస్ట్రీ మీద ఫోకస్ చేసిన ఈ మీడియా సంస్థ.. సౌత్ ను ప్రభావితం చేస్తున్న నటుల్ని ఎంపిక చేయగా.. ఈ ముగ్గురు తేలారు. కాగా, నయన్ సాధించిన ఈ అరుదైన ఘనత పట్ల ఆమె ప్రియుడు విఘ్నేష్‌ శివన్‌ ఆనందాన్ని వ్యక్తంచేశారు. మ‌రోవైపు ఆమె అభిమానులు ఆనందంతో ఉబ్బిత‌బ్బిపోతూ.. న‌య‌న్‌కు శుభాకాంక్ష‌లు తెలుపుతున్నారు.
