ప్రముఖ నటుడు ‘రెబల్ స్టార్’ కృష్ణంరాజు(83) ఆదివారం తెల్ల‌వారు ఝామున మృతిచెందిన సంగ‌తి తెలిసిందే. ఆయ‌న గ‌త కొంత కాలంగా అనారోగ్యంతో బాధ‌ప‌డుతూ హైదరాబాద్లోని ఏఐజీ ఆస్పత్రిలో చికిత్స పొందుతూ తుదిశ్వాస విడిచారని కుటుంబసభ్యులు తెలిపారు. సోమవారం ఉదయం హైదరాబాద్లో అంత్యక్రియలు జరుగుతాయి. ఆయ‌న జీవితంలో కొన్ని కీల‌క ఘ‌ట్టాల‌ను ఇక్క‌డ తెలుసుకుందాం.
– ఏపీలోని పశ్చిమ గోదావరి జిల్లా మొగల్తూరులో 1940 జనవరి 20న కృష్ణంరాజు జ‌న్మించారు.
– ఆయ‌న చదువు పూర్తి కాగానే కొన్నాళ్లు జర్నలిస్టుగా పనిచేశారు.
– 1966లో వచ్చిన ‘చిలకా గోరింక’ చిత్రంతో కృష్ణంరాజు.. వెండితెరకు హీరోగా పరిచయం అయ్యారు.
– కృష్ణంరాజు పాతకాలం నటుడు సీహెచ్ నారాయణరావు వద్ద శిక్షణ తీసుకున్నారు.
– డొండీ నిర్మాణ సారథ్యంలో.. అవేకళ్లు సినిమాలో విల‌న్ పాత్ర ఆయ‌న‌కు మంచి పేరు తీసుకువ‌చ్చింది.
– ఆంధ్రప్రదేశ్‌ ప్రభుత్వం 1977లో అమరదీపం చిత్రానికి, 1984లో బొబ్బిలి బ్రహ్మన్నకు ఆయ‌న నంది అవార్డులు ఇచ్చింది.
– 1986లో తాండ్రపాపారాయుడు చిత్రానికి ఉత్తమ నటుడిగా ఫిల్మ్‌ఫేర్‌ అవార్డు వ‌చ్చింది.
– 2006లో ఫిల్మ్‌ఫేర్‌ దక్షిణాది జీవితసాఫల్య పురస్కారాన్ని తీసుకున్నారు.
– రాజ‌కీయాల్లోకి వచ్చిన ఆయ‌న 1991లో న‌ర‌సాపురం నుంచి కాంగ్రెస్ త‌ర‌పున లోక్‌స‌భ‌కు పోటీ చేసి ఓడిపోయారు.
– 1996 లోక్‌స‌భ మ‌ధ్యంత‌ర ఎన్నిక‌ల్లో కాకినాడ నుంచి బీజేపీ ఎంపీగా గెలిచారు.
– 1999 లోక్‌స‌భ ఎన్నిక‌ల్లో న‌ర‌సాపురం ఎంపీగా గెలిచి వాజ్‌పేయ్ ప్ర‌భుత్వంలో కేంద్ర స‌హాయ మంత్రిగా పనిచేశారు.
– 2004 ఎన్నిక‌ల్లో బీజేపీ నుంచి న‌ర‌సాపురం ఎంపీగా పోటీ చేసి ఓడిపోయారు.
– 2009లో ప్ర‌జారాజ్యం నుంచి రాజ‌మండ్రి ఎంపీగా పోటీ చేసి ఓడిపోయారు.